Di daxuyaniyek hevpar de ku ji aliyê wezîrên karûbarên derve yên gelek welatan ve hat weşandin, hat diyarkirin ku biryarên dawî yên Îsraîlê armanc dikin ku rewşa li ser erdê biguherînin û dagirkeriya xwe ya fiêlî bidomînin.

Ji destpêka mehê ve, Îsraîlê gav avêtine da ku kontrola xwe ya li ser Şerîaya Rojava zêde bike. Ev gav deverên ku ji sala 1967’an vir ve hatine dagirkirin û di bin Peymana Osloyê de radestî Desthilata Filistînê hatine kirin jî hene.

Di daxuyaniya hevpar de, hat gotin ku ev kiryar zirarê didin îhtîmala avakirina dewletek Filistînî û çareseriya du dewletan. Ji hikûmeta Îsraîlê hat xwestin ku biryaran betal bike û li gorî qanûnên navneteweyî tevbigere.

Daxuyanî ji aliyê welatên Skandînavyayê, Îrlanda, Portekîz, Misir, Tirkiye û Endonezyayê ve hat îmzekirin. Rêxistina Hevkariya Îslamî û Yekîtiya Ereban jî piştgirî dan daxuyaniyê.

HEFTEYA BIHURÎ 85 WELAT NERAZÎBÛN NÎŞAN DABÛN

Hefteya bihurî, 85 dewletên endam ên Neteweyên Yekbûyî rexne li kiryarên Îsraîlê kiribûn.

Xebatên avakirina avahiyan di bin hikûmeta Serokwezîr Benjamin Netanyahu de zûtir bûne. Zêdebûna avahiyên li Şerîaya Rojava piştî destpêkirina şerê li Xezeyê di 7’ê Cotmeha 2023’yan de zêdetir bû.

Qudsa Rojhilat ji sala 1967’an vir ve ji aliyê Îsraîlê ve hatiye dagirkirin. Zêdetirî nîv milyon Îsraîlî li wargehên li Şerîaya Rojava dijîn, ku Neteweyên Yekbûyî wan wekî neqanûnî dibîne. Nêzîkî sê milyon Filistînî jî li heman herêmê dijîn.